محمد ابراهيم داوود طالب فرقة رابعة كلية الآداب جامعة المنوفية قسم الإعلام شعبة الإذاعة والتلفزيون
بدأية معرفتي لفن الأركت كانت في تاني ترم في أول سنة ليا ف الكلية
كنت دخلت مرسم الكلية عشان اتعلم رسم ومتوفقتش فيه واتعلمت فن الأركت في نصف ساعة
وجدت شغفي وحبي لفن الأركت ف كملت فيه لحد م وصلت للمستوي دا الحمدلله
طبعاً واجهت صعوبات كتير جدا
ف البداية الفن كان جديد علي الأشخاص وعليا انا شخصياً ف مكنتش حتي سمعت عن الفن قبل كده
ف من الصعوبات اللي كنت بواجهها اول م بدأت جهل الناس للفن دا وعدم تقديرهم لفن الأركت.. وإحباط كتير زي هتعمل ايه بشويه الخشب دول وكلام من دا كده
وهتوصل لايه يعني بشويه خشب وكمية تريقه وإحباط كبير
وعدم بيع المنتجات بسبب جهل الناس بمجهود الشغل ف القطعة الفنية الواحدة
والمجهود الجبار اللي بيحتاجه فن الاركت والوقت والصبر الشديد
فن الاركت قديما كان عباره عن بورتريه طبقه واحده مفرغه محفور عليها الملامح فقط لكن تم تطوير فن الاركت عن طريق عمل بورتريه لاي شخص عده طبقات بدلا من طبقه واحده ويكون هذا النوع من البورتريه معتمد على فكره الظل والنور في هذا البورتريه يكون مثلا ثلاث طبقات او اربعه او خمسه على على حسب الصوره والتفاصيل وهكذا وتم التطوير والوصول الى مستوى عالي من الاحترافيه والدقه
تم استضافتي في العديد من القنوات التلفزيونية مثل القناة الثانية المصرية وقناة النيل الثقافية و موقع صدى البلد وقناة ام بيسي مصر وقناة تن وقناة الأهلي وتم تصوير تقرير تلفزيوني من داخل النادي الأهلي على قناة الأهلي بعد تقديم تقديم بورتريه شخصية الكابتن محمود الخطيب ابدي الكابتن محمود الخطيب إعجابه بالبورتريه وقام بإعطائي العديد من الهدايا التذكارية وأئدر صدره لي العديد من التقارير الصحفية على مواقع مثل اليوم السابع الوطن الدستور أهل مصر المصري اليوم مجلة الطريق مجلة عالم النجوم والعديد من المجلات الأجنبي
قمت بالمشاركة في العديد من المعارض وحصلت علي اوسكار ودرع وبعض الميداليات والعديد والكثير من شهادت التقدير بداية معرفة الفنانين ولاعبي الاهلي ومجلس الإدارة بيا كانت كالتالي
انا عملت بورتريه للفنان أحمد مكي والفنان كريم عبد العزيز والفنان تامر حسني
كنت بنزل شغلي علي مواقع التواصل زي الفيس والانستجرام
الفنان أحمد مكي شافه فيديو شغله له ونزله انستجرام والفنان تامر حسني كمان شافه ونزله وقالي اني مبدع 🥰
لكن الفنان كريم عبد العزيز ف كنت نزلته جروب علي الفيس بوك ومستشار الإعلامي للفنان هو اللي تواصل معايا
بالنسبة للرياضه ف كنت ف قناة الأهلي ف استضافة وقولت اني عاوز اقابل الكابتن محمود الخطيب عشان اهدية البورتريه واقابل كابتن سيد عبدالحفيظ واهدية البورتريه ف استاذ محمد مندور ظبطت مع استاذ ايهاب الخطيب رئيس قناة الأهلي ورتب معاد لي مع الكابتن محمود الخطيب في النادي الأهلي وقابلت حضرته وسلمت حضرته البورتريه وادالي هدايا تذكارية وكابتن سيد عبدالحفيظ شاف حلقة الاهلي وكلمني تليفونيا وشجعني جدا
وباقي اللاعيبه بنزلهم علي الانستجرام وبيشوفوها ويشيرولي
أهدافي ف مجال فن الاركت اني اتعرف اكتر واكتر علي مستوي العالم واكون زي مرتبط بالأركت يعني لما يتقال كلمة الاركت ف معروف أنه داوود الفنان ف الفن دا زي فان چوخ ف الرسم كده واني اعمل معرض عالمي يكون بمصر ويكون فيه حضور للفنانين والمشاهير من داخل وخارج مصر
الدوافع اللي كونت مني شخصية ناجحه
هي اني شخص كنت ناجح طول عمري ودرجاتي كانت عاليه جدا مش من الاوائل بس تحتهم ع طول
كنت ف ٦ ابتدائي اتكرمت تبع القوات المسلحة لأن والدي كان ضابط قوات مسلحة وحاليا بالمعاش كنت جايب ٩٧.١٪
وكانت حفلة جميلة
لحد ٢ثانوي درجاتي كانت عالية جدا
ف ٣ ثانوي وبدون دخول ف تفاصيل كتيره ف جالي اكتئاب بسبب ضغوطات وحاجات كتير كده كنت كاره للحياة
دخلت كلية انا مش حاببها وهي اداب بعد م كان حلم حياتي ادخل كلية جوية
خرجت اسنان بعد م كنت عديت اختبارات كتير كنت خارج بعيط علي حلمي اللي ضاع..قدمت ف لغات وترجمه خاص بس وقتها ظروفنا مكنتش تسمح ف بعد م قدمت وقبل الدراسه بيومين سحبت الورق بعد إلحاح شديد من والدتي كان حياتي وقفت خلاص وانتهت جبت ورقي حطيته ف اقتصاد وكانت من ٦٦ ٪ وانا مجموعي ٨٠٪ والدتي فضلت تدور علي الكليات وقالتلي اداب كويسه ادخلها ف دخلت وانا مش مهتم ودخلت اعلام بتوجية من والدتي وكان مجموعي معديها بكتير وبعد ترم من الكليه بدأت الحكاية واتعلمت الاركت
طولت ف الشرح بس الأسباب الفعليه اني كنت من زمان حابب اكون معروف وبقدم فن وشئ هادف..
كان بيتقال عليا فاشل كتير اوي من اقرب الناس ليا بدون ذكر اسماء..كنت بسمعها بوداني وكانت بتقطع ف قلبي..اتعايرت بنتيجتي وقالولي مستقبلك ضاع وضحكوا عليا..مدرس ما ف الثانويه قالي بالحرف كده ابقي قابلني لو نفعت ف حياتك وكان بيتحداني والحمد لله خسر التحدي.. استاذي مستر ميخائيل رشاد قالي جملة بعد م نجحت والله م انساها طول عمري♥️ قالي اكتر شخص كانوا بيقولوا عليه فاشل ويتريقوا عليه بقي انجح واحد ف دفعته♥️ اهلي كان بيتقالهم اني فاشل من أشخاص ما..حطيت كل الحاجات دي قدامي وقررت انجح واتحدي نفسي عشان اثبت لنفسي
عشان ف يوم احكي قصة تكون ملهمه للناس وهي قصتي
أثبتت لنفسي اني مش شخص عادي من شخص عاوز ينتحر بسبب الثانويه وكلام الناس عنه لشخص بقي ناجح بفضل ربنا ووالدته والدته وأخوه واخته ثم اجتهاده
الحمدلله كل اللي راهنوا علي انكساري وفشلي خسروا وبقوا مش قادرين يشوفوني ناجح
نصيحتي لأخواتي الشباب وخصوصا الفنانين اوعي تستسلم يصديقي خليك فاكر دائما أن الأوقات الصعبة هي اللي بتصنع الابطال
اوعي تسمع كلام المحبطين لأنهم بيعملوا كده لان مش قادرين يشوفوك ناجح ولا قادرين يعملوا اللي انت بتعمله ف عاوزينك فاشل زيهم خليك مؤمن بنفسك واستمر ف السعي وصدق حلمك وصدق نفسك وكمل
مفيش حد نجح بالساهل والله..
الاستمرارية الاستمرارية الاستمرارية كمل ف فنك أو حلمك متوقفش حلمك بكره توصل لحاجه اكبر
