البرلمان: ليش الكهرباء موزينة ياوزير الكهرباء؟
وزير الكهرباء: لأن الناس مشغلة السخانات مما يسبب استهلاك الكهرباء بشكل كبير وتلف مولدات الكهرباء الوطنية.
البرلمان: لكن احنا بفصل الصيف، شلون الناس تشغل السخانات؟ (البرلمانيين العراقيين عايشين خارج العراق ومايدرون بالناس تشغل سخانات ومايدخلون للعراق إلا بوقت الجلسات).
وزير الكهرباء: مو لأن الطقس بالعراق جدا رائع بسبب الطبيعة الجميلة التي تشبه الجنة والأشجار كثيفة والأنهار جارية والهواء جدا بارد بعز الصيف والناس بردانة وتشغل السخانات واكو شهود عيان أكدوا تساقط ثلوج وأمطار غزيرة بالعراق بعز الصيف.
البرلمان: طيب شنو الحل ياوزير الكهرباء؟.
وزير الكهرباء: لازم نغير الطقس بالعراق من بارد إلى حار حتى الناس تطفي السخانات.
البرلمان: وشلون نغير الطقس؟.
وزير الكهرباء: لازم نخاطب ملائكة شارلي، عفوا قصدي ملائكة الطقس حتى يزيدون الحرارة والناس ماتبرد وماتشغل السخانات وبذلك نوفر الكهرباء.
البرلمان: وشلون نخاطب ملائكة الطقس؟.
وزير الكهرباء: نشكل لجنة من مترجمي لغة الملائكة (البرلمانيين المتدينين اللي علاقتهم قوية بالسماء والملائكة ويسمعون تسبيح الملائكة ليل نهار) مع فريق من مهندسي الكهرباء القادرين على الطيران لمرافقة اللجنة البرلمانية الملائكية وتخصيص مبلغ مالي لهذا الإيفاد الاستثنائي في تاريخ العراق لايقل عن عشرة ملايين دولار أمريكي أو مايعادله بالعملة الملائكية لتغطية نفقات السفر إلى السماء لمدة أسبوع للتفاوض مع الملائكة والحجز في فندق الغيوم الذهبية للشخصيات الرسمية مع تذكرة ذهاب وإياب على الخطوط الجوية اضحك شوية.
(نص الحوار كما وردنا من الدائرة الإعلامية للبرلمان)
—
29 تموز 2015
