كان فيه زمان بغبغان مِلون
طلع من البيضة الصغيرة بعد ما إتكون
شاف الدنيا وقال يا سلام
دا الكون جميل من غير كلام
بص على نفسه وهو مكور
شاف بغبغان صغير بريش منور
فرد جناحاته ورفرف بكل غرور
وقال ده أنا أروع من كل الطيور
إيه يعنى الطاوس والتوكان
ده زمنهم ولى وكان كان
إيه يعنى البشروش والفلامنكو
دول جمالهم فالصو زى الديك بينكو
مين قدى يا غابة وأنا قاعد على عرشها
مين زيى ليعلم الجميع فى كل مرجها
إن البغبغان روكو شطور الشطارة
ملك ملوك الطيور الطيارة
جماله ما إتوصفش على حد
أيوه والله ده كلام جد
شوفوا مثلا ريشى المذهب المموج
ده ولا كنوز الملك سليمان المتوج
شوفوا عيونى الزرقا الجميلة
أجمل من عيون المها فى الخميلة
مسموح يشوفو جمالى كل سكان الغابة
متحف تاريخى لكل من هب ودب من الغلابة
وده بس علشان التاريخ وحوادثه
روكو ما بخلش بحسنه على الرعية فى حياته
يلا يا إذاعة وتلفزيون صوروا
ببهائى وروعتى حتتنورا
ويصبح جمالى علم الروكوات
يدرس فى المدارس والجامعات الاجنبيات
دى مثلا ريشة صفرا مدورة
جميلة زى لون الشمس المنورة
ودى ريشة خضرا طويلة
جميلة زى لون الزرع فى الضليلة
ودى ريشة بيضا بتضوى
جميلة زى الهلال فى ليلة بتحكى
ودى ريشة حمرا جريئة
جميلة زى لون الغروب فى الحديقة
ودى ريشة زرقا ذكية
جميلة زى لون البحر وموجته الشقية
ودى ريشة بنى كبيرة
جميلة زى ألوان فراشات كتيرة
ودى ريشة تركواز روعة
عظمة على عظمة يا معجبين ماليش دعوة
ودى ريشة كهرمانية سحارة
ولا كنوز الف ليلة من غير أمارة
ودى ريشة موف خطيرة
ما تتخيلوش مدى بهاها وهيا طايرة
وأخيرا دى ريشة بينك كانها مستوردة
من بلاد السند والهند متوردة
قعد بغبغانا صاحب المعالى
بعد فى ألوان ريشه غير مبالى
كان إسمه البغبغان الصغير روكو
لكن مش زى الديك مفيد بيقول كوكو
روكو يا روكو
فرحان بجمالك ياروكو
منفوش وكانك طاوس متعلم
متعالى وكانك نسر متكلم
مع إن جدو البغبغان الحكيم
قال زمان كلام سليم
المنفوخ لابد حيدور بعد الغرور
حوالين نفسه ويقع فى المحظور
يمسكه قط برى صياد
متربصله كل يوم فى الميعاد
أو يقع وهوا طاير على وش الميه
كانه عمل لنفسه خيه
أو يسقط فى شبكة صياد شديد
يمسكه ويحبسه فى قفص حديد
أو يهجم عليه ويبلعه حتة تعبان
وهوا طلع والا نزل بغبغان غلبان
فرد روكو جناحينه وطار فى الهوا
ما يعرفش ان الغرور ما لوش دوا
يطير يمينه يطير شماله
مسيره يقع بسبب اسوا خصاله
شاف غراب وحيد للصحبة مستنى
نزل جنبه وبغرور قعد يغنى
روكو يمدح فى نفسه ويعد ريشه
كانه ملك بيستعرض جيشه
زعل الغراب وقال بغبغان مغرور
ماحدش اذنله بالحضور
رد روكو وقال ده أنا صاحب المعالى
جمالى فى الغابة جمال خيالى
مين فهمك يا نواح فى الجمال
وانت غراب سوادك ليل طويل فى التلال
طار الغراب بعد ما شعر بالاهانة
وروكو سابه بعد ما عامله بمهانة
دموعه نزلت ورغرغت
وروكو شمت فيه والدنيا كانها زهزهت
أعمل ايه مع الطيور الحقودين
إلى على الغيرة من الملوك متربيين
بدل ما يبوس إيدى يوبخنى
وكانى مش ملكه وطار من غير ما ينحنى
شاف طاوس خلص مع الصحاب لعب
نزل جنبه بعد ما ملكه التعب
قعد روكو يتعالى على الطاوس الجميل
والطاوس مندهش من البغبغان أبو دم تقيل
وما قدرش إنه فى مقام ابوه او عمه
وإستخف بيه وآه يا همه
إيه الغرور ده يا ولد
مافيش غيرك فى البلد
حتة بغبغان أحمق ملخبط
عقله عقل الحمار المخطط
من أول يوم له فى الدنيا
فاكر إنه ملكها فى ثانيا
محدش يا ولد يقدر يضحك على الدنيا الكبيرة
تديله درس فى الاخلاق ويقع فى مواقف خطيرة
شوية ريش وفاكر نفسه ملك الطيور
أمال لو كان طاوس كان عمل إيه المغرور
سابه الطاوس وطار فى تجاهل
بعد ما قال بغبغان بالذوق جاهل
كل طائر يصيبه الغرور
يقع فى الشرور
ويرجع للفضيلة مجرور
حتى إسالوا السياف مسرور
طار روكو ولا همه
من وعظ الطاوس اللى فى سن عمه
وشاف نسر واقف بيتكلم
مع وزراءه واتباعه الكل صامت بيتعلم
نزل جنبه بجرئة الصعلوك
مش مقدر خطورة مخالب الملوك
وزى عادته قال شعر فى جماله
يلف ويدور كانه بدر فى ليلة تمامه
لعل النسر ينحنيله
يا غباء إلى يتوهم إن الملك خليله
بص الملك النسر مندهش
قال ياصعلوك بعيد هش هش
وضحك من التعجب وإحتار
مغرور على إيه يا بو نص منقار
شوية ريش مدهونين
طالعين لفرخ أحمق منبتين
ده أنا ملك كل الطيور
الريشة فيا دستور بتعدى بحور
وزرائى حدايات وعقابات وصقور
ملك البحر والسما وكل الحضور
ولله الاعظم بصغر وأنحنى وأسجد وأركع
ولازم اكون عادل ولغضبه أتوقع
وعمرى أنا العبد الضئيل
ما إتكبرت على طائر ذليل
عمرى ما صابنى الغرور
إلى هوا آفة الطيور
أطلع فى السما بقدرته هايم
أشوف النمل بأمره على الأرض نايم
أنزل هابط زى الطيارة الكبيرة
بأحترم نفسى وبقول السلام على العشيرة
وأشكر ربى وأبعد عن التعالى
والإ حتعلمنى قسوة الليالى
يلا امشى من مجلسى الموقر
علشان بمخالبى فى الارض حعفر
بعدها حتلاقى نفسك وجبة شهية
لتلات نسور وحداية دا إنت لقية
طار روكو مذعور شويتين
وبعد عن الخطر مسافة حتتين
بعدها نسى كل النصايح
ورجع لعادته غروره فى الغابة صايح
فضل طاير طيران طويل بين البرين
هما زعلانين ليه دول شوية متكبرين
حفضل طاير أدور وأدور
لازم أنشر جمالى فى البحور
بعدها ينصبونى امبراطور الغابة روكو الاول
وانافس ملك الغابة زى ملوك الدول
روكو بقت سمعته سيئة وسط الطيور
الجميع بيقول قاطعوا وتجنبوا المغرور
البغبغان تعب من الوحدة والتجاهل
الكل مقاطعه أصله بالأدب جاهل
مغرورنا شاف مكان خطر ظَليل
ما لاحظش إنه مفروش بورق الشجر الجميل
ما حاولش يحذر منه
ما قدرش عدم خبرته وصغر سنه
لف لفة ونزل على طول وسط الخمايل
يروح وييجى بطيش كانه هيسوى الهوايل
ما يعرفش إنه فى خطر كبير المغرور
مش أى مكان طالح لنزول الطيور
ما سالش ليه بابا والا ماما زى الشطور
والا جدو الحكيم أو يقرا فى كتاب الطيور
بدل اللف والدوران يتعلم فنون الحياة زى الحلوين
فن الهبوط فن الحذر فن تجنب الصيادين
قعد يمشى بغرور وبتخايل
يا عينى على إلى حاله مايل
لاحظ ان المكان ساكت بلا أصوات
ومهجور من الطيور ولا حتى الفراشات
مكان إيه ده الى كله خمايل ومهجور
نفسى ألاقى طائر أمارس عليه الغرور
فجاة شاف بغبغان صغير فى مكانه متسمر
واقف قدام خميلة جميلة ومشمر
روكو راح ناحيته وهوا متحير
بص عليه لقاه محتار بوش متغير
روكو قال يكلمه ويجرب
كل ما يمشى ناحيته يلاقيه بيقرب
كل ما يعمل حركة فى دقيقة
يلاقيه بيقلدها زى الحقيقة
رفرف روكو بعد ما فرح بيه
قال أفرد بقى جمالى وأتغزل فيه
أعد ريشى وأصور جماله
أحكى وأوصف فى دلاله
ده أصفر وده أحمر يا سلام
ده بنى وده أسود هوا ده الكلام
ده أخضر وده أزرق يا عينى
ده فضى وده دهبى يا سيدى
ما يعرفش ان ده فخ صياد
وإنه مع الأسر على ميعاد
وإن البغبغان روكو المغرور
حيقضى بقية عمره فى قفص طيور
فجاة حوطته شبكة كبيرة بتبلع
لفت حوالين المغرور وهوا بيتدلع
قعد يصرخ ويقول الحقونى
ياطيور الغابة ياحبايبى انجدونى
يا بابا يا ماما يا جدو الحكيم
تبت والله وكان كلامكوا سليم
ومحدش سال فيه
طبعا عارفين ليه
علشان روكو صابه الغرور
بيتعالى على كل الطيور
أتارى البغبغان الى شافه بيقلده
كان عبارة عن مراية بتمجده
شاف فيها نفسه بجهلها وزيفها
وقعدت تتغزل فى محاسنها وغرورها
والصياد حط تحت الشبكة المراية
شفتوا يا اطفال بقى الحكاية
وبعد كده لقى نفسه اسير
فى قفص دهبى وحزنه كبير
يتباع من محل لمحل فى المدينة
ومن شخص لشخص يسافر على السفينة
يا عينى محبوس زى القرد أنيس
قاعد فى قفص ضيق من غير ونيس
مفروض عليه يستحمل سخافات البشر
وشقاوة الأولاد إلى بيشدوا ريشه بالشر
مرة يرشوا عليه ميه سخنة متعمدين
مرة يخبطوا القفص بالكورة قاصدين
مرة قول أبوك السقامات
والأ مافيش أكل ولا بلح أمهات
مرة تستفرد بيه القطة بوسى
عاوزة تاكله هيا والكلب لوسى
محطوط فى قفص دهبى صحيح
على شباك فى شارع رئيسى مش مريح
وكل مايشوف فى السما عصفور طاير بيمر
يقعد يبكى ويقول بتحسر مر
روكو يا روكو
مغرور بنفسك ليه يا روكو
كنت عايش حر وطليق
دلوقت محبوس بدون صديق
لو كنت بطلت الغرور والتعالى
لو ما كنتش غير مبالى
كان حالك صبح غير كده أنت فى ازمة
بغبغان بيقلد فى القفص ودموعه نازلة
سعره على قد قلة أدبه
بيكرر الكلام زى عدمه
إتعلموا يا كل الاولاد والبنات
روكو اخد درس من الى فات
نذاكر دروسنا
نقرا علومنا
نسمع كلام الكبار
بابا وماما وجدو وابله انتصار
ونبعد نبعد عن الغرور
علشان ما يرجع الخاطر مكسور
—–
